?المساعدة
إزاي روّاج بيشتغل
الأسئلة اللي بتيجي فعلًا، بإجابات فيها الأرقام الحقيقية اللي النظام ماشي بيها.
—الفلوس والضمان
كيف تعمل حماية الدفع
يتم الاحتفاظ بمبلغ الدفع حتى توافق على التسليم. في حال حدوث مشكلة، يمكنك رفع نزاع وسيقوم فريق رواج بمراجعة الأدلة من الطرفين.
رابط مباشر للسؤال دهالمبدع بياخد فلوسه إمتى؟
الموافقة مش معناها الفلوس في إيدك. أول ما العميل يوافق — أو تعدي مدة المراجعة 7 أيام — نصيبك بيدخل أرباحك كـ«معلّق».
بيبقى «متاح» بعد 7 أيام. المدة دي مش تعطيل: دي الفترة اللي البنك لسه يقدر فيها يرجّع الدفعة، ولو اتصرفت قبلها بتبقى فلوس اتصرفت مرتين.
لما يبقى عندك 500 ج.م متاحين على الأقل، تقدر تطلب تحويل. التحويلات بتخرج على دفعات للحساب أو المحفظة المسجلة عندك، وبتوصلك رسالة أول ما التحويل يخرج.
رابط مباشر للسؤال دهالسعر متكوّن من إيه؟
الرقم اللي على الباقة هو اللي المبدع بياخده. فيه حاجتين فوقه، والاتنين بيتعرضوا قبل ما تدفع: روّاج بيضيف 5% رسوم خدمة على اللي إنت بتدفعه، وبياخد 20% عمولة من اللي المبدع بيستلمه.
مفيش أي حاجة بتتضاف بعد كده. مفيش رسوم على الرسايل، ولا رسوم كارت، ولا حساب على تعديل كان أصلًا داخل الباقة.
لو الشغل نفسه اتغير — حاجة مكانتش في البريف — ده تعديل على العقد، بيتسعّر ويتوقّع زي الأصل، مش بيتحاسب في السر.
رابط مباشر للسؤال دهينفع ألغي حجز؟
أيوة، واللي بيرجع بيعتمد على الشغل وصل لفين.
قبل ما الشغل يبدأ فعليًا — قبل الـkickoff — الإلغاء بيرجّع فلوسك كاملة، وبيتنفذ على طول من غير موافقة حد.
بعد ما يبدأ، القاعدة الافتراضية إن نصف المدفوع بيرجع، لأن اللي صوّر يوم مش هيقدر يرجّعه. بعض التخصصات ليها نسبة مختلفة، وبتبان لك على شاشة الحجز قبل ما تأكد. الطرف التاني لازم يوافق على التقسيمة، ولو مفيش اتفاق روّاج هو اللي بيقرر.
ولو فيه نزاع مفتوح على الحجز، الإلغاء بيتقفل تمامًا لحد ما النزاع يتحسم.
رابط مباشر للسؤال ده
—التسليم والمواعيد
بيحصل إيه بعد ما أبعت طلب؟
الطلب مش حجز. المبدع بيشوف البريف والميزانية والميعاد، ولازم يرد خلال 24 ساعة — 12 ساعة لو الشغل مستعجل — وإلا الطلب بينتهي لوحده، عشان متفضلش مستني رد مش جاي.
ممكن يقبل، أو يرفض، أو يقترح تعديل في السعر أو الميعاد. وإنت ترد باقتراح تاني، لحد 2 جولات — كفاية توصلوا لاتفاق، وقليلة كفاية إن المفاوضة متاخدش أسبوع.
العقد بيتولد بعد ما الاتنين يتفقوا، والفلوس بتتحرك بعد العقد. مش قبله.
رابط مباشر للسؤال دهالشغل اتأخر، أعمل إيه؟
كل حجز فيه ميعاد الطرفين شافوه قبل التوقيع.
المبدع اللي شايف إنه مش هيلحق بيطلب مد الميعاد بسبب وتاريخ جديد، وإنت بتوافق أو ترفض، والقرار بيتسجل على الحجز. مفيش ميعاد بيتمد في السكات.
لو الميعاد عدى من غير تسليم ومن غير مد متفق عليه، الحجز بيتحسب متأخر: بيأثر على نسبة الالتزام بالمواعيد بتاعة المبدع وبتبان على صفحته، وإنت تقدر تلغي أو تفتح نزاع. فلوسك محجوزة طول الوقت ده — التأخير مبيحركش فلوس.
رابط مباشر للسؤال دهالتعديلات بتمشي إزاي؟
عدد جولات التعديل جزء من الباقة، وبيبان على الشاشة قبل ما تحجز.
اطلب التعديل جوه مدة المراجعة، والمبدع بيسلّم تاني. الميعاد والفلوس المحجوزة مبيتأثروش.
لما الجولات المتضمنة تخلص، تقدر تشتري جولة زيادة بسعر المبدع حدده، وبيوصله إشعار إنك دفعتها. وخلي بالك: طلب حاجة مكانتش في البريف من الأساس ده مش تعديل — ده تغيير في العقد، وبيتسعّر ويتوقّع.
رابط مباشر للسؤال ده
—الثقة والتقييم والنزاعات
إزاي أفتح نزاع؟
افتح الحجز وارفع نزاع قبل ما مدة المراجعة تخلص. اكتب المشكلة بالظبط وارفع الأدلة: الملفات، البريف، الرسايل.
الطرف التاني بيتبلّغ فورًا وبيرفع أدلته هو كمان. الفلوس بتفضل محجوزة — مفيش فك ولا استرداد وقت ما النزاع مفتوح.
فريق روّاج بيقرا الاتنين ويقرر: يفك الفلوس للمبدع، أو يرجّعها للعميل، أو يقسّمها. القرار وسببه بيتكتبوا على الحجز نفسه، فمحدش محتاج يتخانق في الرسايل.
النزاع مش أول خطوة. لو المسألة تعديل، اطلب تعديل — النزاع للحاجات اللي فعلًا مش متعملة.
رابط مباشر للسؤال ده«موثّق» و«موثوق» معناهم إيه؟
كل مبدع بيبدأ «مُدرج»: قدّم، وحد من روّاج قرا طلبه وشاف شغله، وبقى مسموح له يستقبل حجوزات.
«موثّق» بيتكسب مش بيتشترى: محتاج 3 حجوزات مكتملة على روّاج على الأقل، ونسبة التزام بالمواعيد 85% أو أكتر.
«موثوق» هو الأعلى: 15 حجز مكتمل، و92% التزام بالمواعيد، ومتوسط تقييم 4.6 أو أعلى.
ومهما كانت العلامة، إثبات الشخصية بيتراجع قبل ما أي فلوس تتحوّل. ولا واحدة من التلاتة بتتباع.
رابط مباشر للسؤال دهالتقييمات بتشتغل إزاي؟
الطرفين بيقيّموا بعض بعد ما الحجز يخلص، ومفيش تقييم بيتنشر غير لما الاتنين يكتبوا أو تعدي 14 يوم. يعني محدش بيكتب رد على تقييم شافه.
المبدع يقدر يرد مرة واحدة، علنًا. والتقييم اللي بيكسر القواعد بيتبلّغ عنه وبيتقرا من فريق روّاج.
التقييم على الصفحة مبيظهرش غير لما يبقى وراه 3 حجوزات مكتملة على الأقل — رأي واحد مش سجل.
رابط مباشر للسؤال ده
—حسابك
أغيّر الرابط بتاعي إزاي؟
الـhandle هو آخر جزء من رابطك — rawaj.co/اسمك. بتغيّره من الاستوديو، في صفحة بياناتك.
الشروط: حروف إنجليزي صغيرة وأرقام وشرطات، من 3 لـ40 حرف. الحقل بيقولك وإنت بتكتب لو الاسم متاح أو محجوز.
أهم حاجة: القديم بيبطل يشتغل في نفس اللحظة اللي بتحفظ فيها، وميتحجزش لك — أي حد يقدر ياخده. فغيّره مرة، بدري، وبعدها حدّث الرابط في أي مكان حطيته فيه.
اسمك المعروض حاجة تانية خالص، وبتغيّره من الإعدادات من غير ما يكسر أي رابط.
رابط مباشر للسؤال ده
—النص الرسمي
الصفحة دي بتشرح بلغة عادية. اللي بيلزم قانونًا هو المستندات نفسها والعقد اللي إنت وقّعته.